Жеке үйді не саяжайды сумен жабдықтау: тораптар мен жабдық

Жалпы алғанда, қала сыртындағы коттеджді немесе саяжайды сумен жабдықтау схемасы мынадай тораптардан тұрады:

• су көзі — ол ұңғыма, құдық, табиғи су қоймасы немесе ағын су, ауызсу немесе техникалық су тасымалдайтын магистральдық құбыржолдан тартылған құбыр болуы мүмкін;
• су беру сорғысы;
• ішкі құбыржол;
• тарату коллекторы;
• кез келген типтегі су жылытқыш;
• қосымша сумен жабдықтау жабдықтары.

Сорғылар су көзінің түріне қарай батырмалы, сыртқы немесе қолданыстағы құбыржолға кіріктірілетін болуы мүмкін. Олардың барлығы өндірістік қуаты жағынан ерекшеленеді, ал су беру арыны осы шамаға байланысты.

Сорғылардың әр түріне өзіндік талаптар қойылады. Мысалы, ұңғымалық модельдер ұңғымаға еш кедергісіз түсіріп, қажет болғанда одан шығарып алу үшін тар әрі ұзын, қабырғалары тегіс болуы тиіс.

Жеке сорғылардың орнына көбінесе арынды бактармен жинақталған тұтас сорғы станциялары пайдаланылады.

Үйішілік құбыржолдар көбінесе диаметрі 1 дюйм және одан үлкен металл-пластик құбырдан жасалады. Металмен арматураланбаған полипропилен және басқа да пластик құбырлар да кең таралған. Құбыржолдың ғимараттан тыс өтетін учаскелері қыста ішіндегі судың қатып қалмауы үшін сенімді түрде жылу оқшаулануы тиіс.

Тарату коллекторы судың үйге кіретін жерінде орнатылады және су ағынын әр түрлі тұтынушыларға бағытталған жекелеген ағыншаларға бөлуге қызмет етеді. Бұл — бір ұшында сұйықтық кірісі, екінші ұшында бітеуіші бар құбыр кесіндісі. Оның бүйір бетінде бұру құбыржолдарының қажетті саны қосылатын қосу ұялары орналасқан.

Қала сыртындағы коттеджде немесе саяжайда кез келген типтегі су жылыту құрылғысын пайдалануға болады:

• ағын типті электр су жылытқыш;
• газ колонкасы;
• жинақтаушы типті аспап (бойлер).

Оның түрі мен сыйымдылығы нақты пайдалану жағдайларына — үйді немесе саяжайды пайдалану жиілігіне, тұрғындар санына, ғимараттағы ванна бөлмелерінің санына қарай таңдалады.

Саяжай үйіне немесе қала сыртындағы тұрғын коттеджге арналған кейбір қосымша сумен жабдықтау жабдықтары да бар. Бұлар сорғы станцияларының құрамына кіретін гидроаккумуляторлар (арынды бактар), қысымды арттыратын циркуляциялық сорғылар болуы мүмкін. Тарату коллекторларын кірісте ғана емес, ыстық сумен жабдықтаудың ішкі контурында да бөлек орнатуға болады. Келетін суды алдын ала және ақтап тазартуға арналған сүзгілер де артық болмайды. Сондай-ақ түрлі бекіту-реттеу арматурасы қажет болады.

Сұрақтарыңыз туындады ма?